Da li ste se ikada zapitale koliki je životni vijek vašeg donjeg veša? Ili, kada ste posljednji put osjetile da vam je grudnjak postao malo veći, ali ste to ignorisale i nastavile i dalje da ga nosite? Istu veličinu uvijek nosite, zar ne?
Pa, zapravo i ne! Osim što vam je možda potrebna druga veličina ili da podesite grudnjak tako da vam korpice bolje odgovaraju i pružaju neophodnu podršku, grudnjake bi trebalo da mijenjate svakih šest do osam mjeseci.
Zbog pranja, postava u grudnjaku mijenja svoj oblik, a ukoliko često nosite isti grudnjak, njegova elastičnost sigurno neće trajati duže od pola godine. Nakon toga, on postaje “opušten” te ne pruža adekvatnu podršku grudima.
Naravno, grudnjaci će vam duže trajati ako ih “rotirate”, ali i ako ih perete u hladnoj vodi, jer na taj način će sporije gubiti elastičnost. Međutim, nemojte čekati da prođe šest mjeseci ukoliko vam ovaj komad unutrašnjeg veša ne pruža neophodnu podršku – potrebno je da bar jednom mjesečno provjerite da se bretele nisu opustile te da ih (ukoliko je neophodno) podesite.
Takođe, da ga ne biste mijenjale nakon dva mjeseca, grudnjak nikada ne sušite u sušilici ili na žici – najbolje je da ga sušite tako što ćete ga položiti na čist peškir sa korpicama okrenutim prema gore. Imajte na umu i da je višak vode iz grudnjaka uvijek potrebno pokupiti peškirom (nemojte pokušavati da ga iscijedite uvrtanjem), jer – pogađate – na taj način ga nećete oštetiti te će vam on i duže trajati.
Autor: minimagazin.info
